Mukhang matutuloy na ang TV remake ng Machete na gagawin sa GMA Telebabad at iisa lang ang nababagay sa role na ito kundi si Aljur Abrenica.
Ngayon pa lang ay pinaghahandaan na ito ng young actor kaya panay ang gym niya. Nakausap namin si Cesar Montano na original na Machete at agree siya na dapat kay Aljur ito ibigay.
Puring-puri ni Cesar si Aljur dahil nakatrabaho niya ito sa Ilumina kaya suportado niya rito ang makisig na young actor.
Tinanong namin si Aljur, sakaling papiliin siya kina Bianca King, Rhian Ramos at Rich Asuncion na magiging leading lady, sino ang pipiliin niya?
Si Rhian ang pinili niya dahil naging kumportable na raw siyang makatrabaho ito sa Ilumina at gusto raw niyang makatrabaho uli ang magandang young actress.
